ROXAS CITY – Ginbawian sang kabuhi ang isa ka 2nd year College BIT student matapos gin-atake sang iya ginasuprehir nga congenital heart problem kadungan sang masinadyahon nga Acquaintance Party sang Capiz State University – Main Campus.
Sa nakuha nga impormasyon sang Bombo Radyo, ang wala na ginhingadlan nga estudyante ang isa ka lalaki kag natalupangdan nalang sang mga kaupdanan sini nga daw indi na ini makaginhawa.
Suno sa isa sa mga nakasaksi, nagapatigayon ang mga ini sang parlor games nga isa sa mga pahampang nga ginpatigayon sang mga estudyante sa nasambit nga kahiwatan.
Bangud sa natabo nga insidente, madasig naman nga ginpadangat sa isa ka pribado nga ospital ang biktima para sa nagakaigo nga pagbulong apang wala ini makasalbar kag ginbawian sang kabuhi.
Sa karon yara na ang bangkay sang biktima sa isa ka punerarya.
