Ginakabig sang isa ka Constitutional Law expert kag Presidente sang Philippine Arbitration sa Visayas nga “purely propaganda” ang ginpasaka nga ethics complaint batok kay Senator-Judge Pia Cayetano sang isa ka grupo sang women’s rights advocates, academics kag feminists.
Sa interview sang Bombo Radyo kay Atty. Joenar Pueblo, iya ginpahayag wala ini may nakita nga basehan agud masuspend si Cayetano bangud lamang sa alegasyon nga nag-share ini sang isa ka ginalegar spliced ukon edited nga video samtang nagaserbe bilang senator-judge sa impeachment trial ni Vice President Sara Duterte.
Suno kay Pueblo, normal lamang nga may nagkalain-lain nga opinyon kag paghangop ang mga senador bangud nga mga tawo man sila. Apang, nagapati siya nga masarangan man ini masolbar paagi sa husto nga proseso sang Senado.
Sa pihak nga bahin, ginhingyo sang mga complainant kay Senate Committee on Ethics and Privileges Chair Sen. Vicente “Tito” Sotto III nga imbestigahan si Cayetano angot sa iya gin-post sa social media nga ila ginaalegar nga nagpakita sang bias sa impeachment proceedings.
