Eumir Marcial, emosyonal sa pagkapiyerde batuk sa mas bataon nga Uzbek boxer

Napaslawan si Pinoy boxer Eumir Marcial sa men’s 80 kgs. sa nagapadayon nga Paris Olympics.

Nakuha sang nakasumpong sini nga si Turabek Khabibullaev gikan sa Uzbekistan ang unanimous decision.

Sa una nga round pa lamang, gingamit sang Uzbekistan boxer ang iya nga kataason kag kalabaon sang kamot agud makuha ang score halin sa lima ka judges.

Ginpilit sang 28-anyos nga si Marcial nga makalagas apang nangin makilas kag madasig ang paglikaw sang 20-anyos nga Uzbekistan boxer.

Matapos ang hampang, ginpasalamatan sang Pinoy boxer ang mga nagsuporta sa iya kag nagpangayo sang pasensiya bangud sa kapaslawan.

Nangin emosyonal si Marcial bangud ginpaiway sini ang iya nga professional boxing career agud matutukan ang hampang sa Olympics.