ROXAS CITY – Amat-amat na nga nagabalik sa normal ang sitwasyon sa Norway kasunod sang ginapangatubang sa karon nga coronavirus disease (COVID-19) pandemic.
Ito ang base sa report sa Bombo Radyo sang chairwoman sang European Network of Filipino Diaspora (ENFID) nga si Bombo International Correspondent Leonor Sarmiento Vintervoll.
Suno diri nga amat-amat na nga nagabalik sa normal ang sitwasyon sa pungsod sa pihak sang pagsaka pa sang kaso sang amo nga balatian bangud mas dako ang narerekord nga recoveries sa kada adlaw.
Bangud suno diri sa pagka-disiplinado kag masinulundon sang mga residente sa pungsod, mas napahapos ang kampanya sang gobyerno kontra sa nasambit nga balatian.
Ginkompirma man sini nga mas mabudlay ang sitwasyon sang mga undocumented OFW’s bangud indi sila sakop sa bulig nga ginahatag sang gobyerno.
Apang wala man suno diri ginapabay-an sang mga Pinoy ang ila mga kasimanwa bangud may tagsa-tagsa sila ka pamaagi agud mabuligan ang mga ini.
Sa pagkamatuod suno diri, bilang pinuno sang ENFID, ila ginaduso nga mahatagan sang amnestiya ang mga undocumented OFW’s sa pungsod nga tuman nga naapektuhan sang pandemiya.
Nagpanawagan man ini samga Filipino sa Pilipinas nga sa baylo nga pakamalauton, sundon na lamang ang ginamandu sang gobyerno agud mapadasig ang pagtapna sang paglapta sang nasambit nga virus.
