Na-monitor sang Philippine authorities ang ginapahayag pagkit-anay nanday dismissed Bamban Mayor Alice Guo kag ang negosyante nga si Cassandra Ong sa Singapore.
Mahibaluan nga pareho nga imbolbado ang duha sa iligal nga operasyon sang POGO sa pungsod.
Ini matapos nga ginkumpirmar ni Santa Rosa City Lone District Rep. Dan Fernandez nga yara na sa karon sa kustodiya sang Indonesian Immigration authorities si Ong.
Ginmanduan sang Quad Committee ang Police attache nga makig-angut sa Indonesia para sa pagbalik sa Pilipinas ni Ong.
Una na nga ginpahayag sang Komite nga posible nga ikunsiderar sang House Quad Committee ang gin-file nga supplemental motion for reconsideration ni Ronalyn Baterna nga imbolbado sa iligal nga operasyon sang POGO sa pungsod.
Suno kay Quad Committee Chairman Surigao del Norte Rep. Robert Ace Barbers nga pagadesisyunan pa sang komite ang nasambit nga motion for reconsideration gikan kay Ms Baterna nga isa sa mga resource person sang komite.
Suno kay Rep. Dan Fernandez chairman sang House Committee on Public Order and Safety nga mahimo tugutan sang quad comm ang gin-file nga motion for reconsideration ni Baterna subong nga sa kustodiya na sa karon sang Bureau of Immigration sa Indonesia si Cassandra Ong.
Si Ong nga isa ka negosyante ang na cite-in-contempt sang House of Representatives bangud sa indi pagtambong sini sa mga hearing sang Kamara natuhoy sa kontrobersiya sa POGO.
