ROXAS CITY – Presuhan ang ginsudlan sang anay punong barangay sang Barangay Pili, banwa sang Panay, Capiz matapos ang madinalag-on nga drug buy bust operation sang Philippine Drug Enforcement Agency (PDEA) Region 6 sa nasambit nga lugar.
Narekober sang mga otoridad kay anay punong barangay Diaster Genoves 38-anyos ang masobra isa ka gamu sang shabu, P500 nga marked money, P6,000 nga budol money, cellphone kag drug paraphernalia.
Napaslawan si Genoves nga makadalagan, bangud ulihi na ini nakatalupangod nga pulis ang iya nga ka-transaksyon.
Una nga nadakpan si Genoves sa Barangay Punta Tabuc, Roxas City sadtong Hulyo 2013, apang nahilway man matapos ang pila ka tuig.
Nahibaluan nga isa ka bulan pa lamang sang nakaguwa sa presuhan ang anay opisyal apang na-monitor nga liwat nagbalik sa pagbaligya sang shabu rason nga ginpatigayon ang operasyon.
Aminado si Genoves nga user lamang ini kag indi pusher.
