Nagtaliwan na ang anay Bureau of Corrections (BuCor) director general kag National Bureau of Investigation (NBI) deputy director Rafael Ragos.
Ginkumpirmar ini sang iya hinablos nga si Winston Ragos apang wala na naghatag sang dugang nga detalye.
Matandaan nga isa si Ragos sa mga testigo batuk kay anay Senador Leila de Lima nga gin-akusaran nga utok sa pagbaligya sang iligal nga druga sa New Bilibid Prison sang justice secretary pa ang anay senador.
Ang iya testimonya ang nangin basehan sa pagpasaka sang isa sa tatlo ka kaso sa droga batuk kay de Lima sa Muntinlupa Regional Trial Court.
Apang, sang Abril 2022, ginbawi ni Ragos ang iya testimonya kag napilitan nga magbutig bangud sang mando sang sadto nga National Police Commission (NAPOLCOM) Commissioner Vitaliano Aguirre II.
Bangud sang pagbawi sang testimonya, si de Lima ginhilway sang Mayo 2023.
Nagpalab-ot man sang pagpakig-unong si Mamamayang Liberal party-list Rep. Leila de Lima sa pamilya ni Ragos, nga nagadayaw sa iya sa pagbuyagyag sang mga yara sa likod sang pagpakalain sa iya.
