PRESIDENT ROXAS, CAPIZ – Balik-presuhan ang isa ka ex-convict matapos makuhaan sang ilegal nga droga, armas-luthang kag mga bala sa ginpatigayon nga search warrant sang gintingob nga pwersa sang President Roxas, Pilar kag Pontevedra PNP sa Elizalde Street, Barangay Poblacion, President Roxas, Capiz.
Ginkilala ang naaresto nga si Mark Dolorfino, 39 anyos kag residente man sang nasambit nga lugar.
Suno kay Police Captain Hilbert Gervero, narekober sang ila grupo ang 9 ka sachets sang shabu, 13 pa ka mga plastic sachets nga may shabu residue, pito ka mga bala, isa ka calibre .45 nga armas-luthang, mga drug paraphernalia, masobra sa P61, 000 nga cash kag iban pa nga mga kagamitan.
Ginpahayag pa sang opisyal nga ginakabig nga high value target (HVT) ang suspek.
Suno diri, naaresto man sadto sa isa ka drug buybust operation si Dolorfino kag napriso sang halos apat ka tuig apang nahilway ini sadtong tuig 2018 pinaagi sa plea-bargaining agreement.
Apang gilayon nila nga ginpaidalom sa surveillance ang suspek matapos namonitor nga nagbalik ini sa ila ilegal nga aktibidad.
Sa karon nakaaresto na ang suspek sa President Roxas PNP kag natalana nga pasakaan sang nagakaigo nga panumbungon.
