ROXAS CITY – Arestado ang 41-anyos nga ex-convict sa ginpatigayon nga drug buybust operation sang mga kapulisan sa Barangay 5, Roxas City.
Ginkilala ang nadakpan kay Leo Gaborne sang nasambit man nga lugar.
Suno kay Police Master Sergeant Ramil Arcangeles, tagpamaba sang Roxas City PNP nga masobra tatlo ka semana nga nagpatigayon sang monitoring ang mga kapulisan sa suspek tubtob nga nagpatigayon na sila sang operasyon kag natigayon nga nadakpan ang suspek.
Mahibaluan nga bag-o lamang nahilway sa bilangguan ang suspek sadtong Hulyo 24, 2019 bangud sa plea bargaining matapos nadakpan sadtong Setyembre 24, 2018.
Samtang, ginpanginwala naman ni Gaborne nga nagaduso kag nagagamit ini sang iligal nga droga.
Narekober naman sa posisyon sang suspek ang anum tanan ka sachets sang ginapatihan shabu, isa ka unit sang 380 caliber pistol nga may isa ka magazine kag napulo ka mga live ammunitions, isa ka unit sang cellphone, P200,000 nga buybust money kag mga drug paraphernalia.
Nagapangatubang naman ang suspek sa panumbungon nga paglapas sa RA 9165 ukon Comprehensive Dangerous Drugs Act of 2002.
Sa karon, nakahunong na sa karsel sang Roxas City PNP ang suspek.
