Arestado ang duha ka mga drug personality sa ginpatigayon nga drug buy bust operation sang station drug enforcement team sang Roxas City PNP sa Costa Verde subdivision, Barangay Cagay, Roxas City.
Kalakip sa nadakpan sang kapulisan amo sanday Johan Patrick Dequina alyas JP, 40-anyos sang nasambit man nga lugar kag ex-convict kag Ervin Klein Dorado 24-anyos sang Malipayon village, Barangay Tiza sining siyudad.
Suno kay Police Lieutenant Colonel Dante Tayco hepe sang Roxas City PNP narekober sa mga suspek ang apat tanan ka sachets sang ginapatihan shabu, duha ka unit sang cellphone, 500 pesos nga marked money kag mga drug paraphernalia.
Nahibaluan nga nagapakigtransaksyon lamang ang subject person nga si Dequina sa mga kilala sini nga kustomer.
Ginpanginwala sang duha nga may nahinabo nga buy bust operation sa diin nagguwa lamang sila sa balay agud kuntani magbakal sang sigarilyo, apang nakibot sang gindakup sang mga pulis.
Ginkwestyon pa ni Dequina ang pagsulod sang mga operatiba sa ila balay nga wala sang may ginpakita nga search warrant.
Ginaalegar pa sini nga ginsakit siya sang mga pulis.
Samtang suno naman kay city councilor elect Moreno ‘’Moring’’ Gonzaga nga wala sa listahan sa barangay ang pangalan ni Dequina.
Apang aminado ang opisyal nga may ginamonitor sila sadto nga indibidwal sa lugar nga nagaduso sang droga, apang sa karon nagpadulong na ini sa Metro Manila.
Sa karon, yara na sa kustodiya sang Roxas City PNP ang mga suspek kag natalana naman nga pasakaan sang panumbungon nga paglapas sa Republic Act 9165 ukon Comprehensive Dangerous Drugs Act of 2002.
