ROXAS CITY – Yara na sa kostodiya sang pulisya ang drug suspek nga si Elmer Durana 35-anyos sang Barangay Banica, sining syudad, matapos naaresto sa ginpatigayon nga drug buy bust operation sang Station Drug Enforcement Team sang Roxas City PNP sa Ellieta St., Barangay 2, sining syudad.
Nakuha sa posesyon ni Durana ang apat ka sachets sang ginapatihan shabu, P500 nga marked money, isa ka unit sang cellphone kag pouch.
Ginabulubanta nga nagabalor sang P4,000 ang nakumpiskar nga droga sa subject person.
Ginpahayag ni Police Master Sergeant Ramil Arcangeles, tagpamaba sang Roxas City PNP nga duha ka semana nga ginpaidalum sa monitoring si Durana, antes ginpatigayon ang operasyon.
Ginkumpirma ni Arcangeles nga yara sa ila listahan ang mga pangalan nga ginbuyagyag ni Durana nga kalakip man sa iya mga kaupdanan nga nagaduso sang droga.
Samtang hugot naman nga ginpanginwala ni Durana nga siya ang nagapanag-iya sang nakumpiskar nga droga, sa diin gintudlo sini ang iya nga abyan nga wala gintumod ang pangalan.
Aminado man si Durana nga napreso na ini sang 2006 bangud sa kaso may kaangtanan sa droga kag 2011 nakaguwa sa bilangguan.
Nagtenir sa Isla sang Boracay matapos nga nagtrabaho bilang construction worker.
Gintuad sini nga gamay lamang ang iya ginakita sa pagduso sang droga sa diin ensakto lamang sa pagbakal sang bugas.
