ROXAS CITY – Balik-presuhan ang maglive-in partner matapos madakpan sa ginkasa nga drug buybust operation sang Station Drug Enforcement Team sang Roxas City Police Station sa Barangay Tiza, Roxas City.
Ginkilala ang mga arestado nga sanday Serafin Celiz, 50 anyos kag live-in partner sini nga si Lyka Eslabon, 21 anyos sang Barangay Cogon, Panay.
Narekober sa mga suspek ang napulo ka sachets sang ginapatihan shabu nga ginabulubanta nagabalor sang kapin P135, 000, isa ka pouch nga nagaduag brown, isa ka unit sang cellphone kag P500 nga buybust money.
Mahibaluan nga una na nga naaresto ang nasambit nga mga suspek apang ginpahilway pinaagi sa plea bargaining.
Magapangatubang ang mga suspek sa kaso nga paglapas sa Republic Act 9165 ukon Comprehensive Dangerous Drugs Act of 2002.
Samtang ginpahayag ni Police Lt. Col. Dante Tayco, hepe sang Roxas City PNP, nga sang ila ginbukad ang cellphone ni Eslabon didto nakit-an ang bayluhanay sang text message nga may ginpadala sa iloy ni Eslabon pinaagi sa LBC Express.
Sang ginpadulungan sang mga kapulisan, nakit-an ang iloy ni Lyka nga si Myleen Eslabon nga nag-claim sang amo nga padala kag sang ginbukad ang karton nakit-an ang kapin sa 50 gramos sang shabu nga ginabulubanta nagabalor sang P675, 000.
Bangud diri, gin-aresto man sang mga otoridad ang iloy ni Lyka nga si Myleen.
