Patay ang duha ka mga kalalakinhan sa hacking kag stabbing incident nga nagluntad sa Barangay Mangoso, Sigma, Capiz.
Nag-angkon sang patal nga pilas sa lawas ang nagkalamatay nga sanday Isidro Jeroso Sr., 59-anyos kag isa ka mangunguma kag Mario Marzan 44-anyos isa ka driver, lunsay mga residente sang nasambit nga lugar.
Ang mga suspek nga ginatudlo nga responsable sa krimen amo sanday Crisaldo Belarmino nga yara karon sa ospital, anak sini nga si Christian Belarmino kag Antonio Villan Jr. nga nagpalagyo matapos ang krimen.
Nahibaluan nga magkaupod nga nagainum ang duha ka mga biktima sa balay ni anay Kapitan Jeroso samtang ang mga suspek naman nga ginalakipan sang mag-amay nga Belarmino kag Villan Jr., ang nagainum sa balay sang pamilya Belarmino.
Padayon sa karon ang imbestigasyon sang Sigma Municipal Police Station sa nagluntad nga krimen bangud may pila ka mga bersyon nga nagaguha.
Apang ginpahayag ni Kagawad Norma Arboleda, ugangan sang tanod nga si Marzan nga ginyudyod sang tatlo ka mga suspek ang iya umagad sa balay ni Jeroso kag ginpulihan buno kag labo sa magkatuhay nga parte sang lawas.
Ginapanindugan sang ginang nga ang mga suspek mismo ang naggubat sa mga biktima nga matawhay nga naga-inum sa balay ni Jeroso sa diin ila ini ginpulihan labo kag buno, samtang ginbuno naman sa tiyan ang anay kapitan kag nakita ini sa iya puluy-an nga duguon kag wala na sang kabuhi.
Samtang gindepensahan naman ni Jewel Dapat, live-in partner sang ginatudlo suspek nga si Crisaldo Belarmino.
Suno sa ginang nga wala sang kamatuoran nga matunog ang tingog sang iya partner kag sang mga kaupod sini nga naga-inum sa ila nga balay kagab-i.
Apang ba-se sa panaysayon sini nga may naghaboy sang bato sa ila balay sang ab-I nga nagluntad ang krimen, gani nag-untat inum ang tatlo.
Sang ila ginbantayan kun sin-o ang naghaboy sang bato, ila nakita si Marzan nga nagsulod sa balay ni Jeroso kag ila ini ginpamangkot ngaa ginhaboy sila sang bato.
Sa baylo nga magsabat dala ni Marzan ang sanduko kaupod si Jeroso nga nagpadulong sa balay sang pamilya Belarmino.
Ginpahayag sang ginang nga samtang ginatulod nanday Marzan kag Jeroso ang pirtahan ginapunggan naman ni Villan ang pirtahan sa sulod sang balay.
Gindugang pa sang ginang nga si Villan nga may ginauyatan man nga sanduko ang nakabuno kay Marzan samtang si Crisaldo naman ang nakabuno kay Jeroso nga nauna naglampus sang butong sa nawong kag ulo sang naulihi.
Ginklaro sang ginang nga wala sang kahilabtanan si Christian nga anak ni Crisaldo bangud nagbulig lamang ini patindog sa iya amay nga pilason.
Samtang ginapanindugan ni Jewel nga wala matabo ang krimen kun wala lamang sila gingubat nanday Marzan kag Jeroso.
