ROXAS CITY – Nagdepensa karon ang isa ka anay kagawad kag encargado ukon manugbantay sang duta sang pamilya Consing sa Barangay Binuntucan, Pontevedra, Capiz natuhoy sa ginpalab-ot nga reklamo sang pila ka mga mangunguma batuk sa iya.
Suno kay Mr. Rolly Degala, ginsugo lamang siya sang nagadumala sa amo nga duta nga si John Dema-ala nga sawayon ang mga mangunguma nga nagakopras sang lubi bangud wala ini sang pahanugot sa iya.
Bangud diri, nagpaupod si Degala sa mga opisyales sa ila barangay agud usisaon kuntani ang mga mangunguma apang suno diri, ginpangmulay pa sila sang mga ini kag sila pa ang akig.
Dugang pa ni Degala nga iya man nakit-an nga may nagabukol sa kilid sang isa ka mangunguma nga indi matumod nga butang gani para sa ila nga seguridad, ginpakamaayo sini nga magpangayo sang responde sa mga pulis.
Diri pa lamang suno sa iya nakuha ang mga kopras gikan sa nasambit nga mga mangunguma.
Suno kay Degala nga wala man kuntani sang problema ang ginhimo sang mga mangunguma kun naglaong lamang sila sang ensakto agud nga maabisuhan man sini ang pamilya Consing bangud sa iya ginpasalig ang nasambit nga kadutaan.
Wala man suno kay Degala sang kamatuoran ang ginapahayag sang isa ka mangunguma nga si Romeo Lamson nga madugay na sila nga nagapananom sa amo nga kadutaan bangud pangayaw lamang ini kag nakapangasawa sa amo nga lugar.
