ROXAS CITY – Desidido ang anay alkalde sang banwa sang Pilar nga magpasaka sang panumbungon batuk sa mga katapu sang Pilar Municipal Fire Station bangud sa ila pagka-arogante kag kapaslawan nga himoon ang pangabay nga magresponde sa nasunog nga katubuhan sa Barangay Jolongajog, Pontevedra.
Ginpahayag ni Ex Mayor Gideon ‘’Ike’’ Patricio nga dismayado ini sa nangin aktwasyon sang mga bombero bangud nagapakita lamang ini nga wala sila sang pagkabalaka sa nagapangayo sang bulig sa ila nga mga sibilyan.
Naglain pa ang buot sang anay opisyal bangud sa pihak nga makaduha ka beses nga nagbalik sa fire station sang Pilar ang iya ginsugo nga magpangayo sang bulig, apang madamo pa sang alibi ang mga bombero.
Suno kay Patricio nga sang iya tagdumalahan, gilayon nagaresponde ang fire truck sa mga sunog bangud emergency ini nga kinahanglan sang gilayon nga aksyon.
Wala man nalikawan sang anay alkalde nga magpahayag sang kalain sang buot sa diin nakabulig man ini sang iya administrasyon agud mahatagan sang fire truck ang Pilar Municipal Fire Station.
Ginpanindugan pa ni Patricio nga isa sa mga rason nga luyag sini matapna ang sunog sa iya nga kampo, bangud gikan sa iya katubuhan.
