Ginpahayag nga wala sang kalain sang buot si anay PNP Chief General Nicolas Torre III matapos ginpahalin bilang hepe sang national police.
Sa interview sang Kamara kay Torre, iya ginpahayag nga suportado niya sa gihapon si Presidente Bongbong Marcos kag wala ini sang paghinulsol.
Gin-ako sang anay hepe sang national police nga ginabaton niya nga wala sang permanente nga posisyon.
Indi man luyag magsabat si Torre kun bala batunon niya ang anuman nga posisyon sa gobyerno kag mas maayo nga hulaton na lang ang official announcement kon may itanyag sa iya.
Ginkumpirmar sang opisyal nga natalana na ini nga mag-file sang leave of absence bangud tubtob subong isa pa ini ka pulis.
Wala pa sang istorya nga turn-over, ilabi na nga wala pa sang abiso kag 4-star general pa ini.
Sa pihak sang mga sirkumstansya, ginbuyagyag ni Torre nga indi siya mapait, sa pagkamatuod handa ini nga maghatag sang panugyan sa bag-o nga PNP Chief nga si PLt.General Jose Melencio Nartatez nga iya gintawag nga “very good police officer”.
Ginklaro man ni Torre nga “on good terms” sila ni DILG Secretary Jonvic Remulla.
Ginbuyagyag man ni Torre nga nagbisita siya sa Kamara agud personal nga magpahalipay kag magdala sang cake kay Mamamayang Liberal Partylist Representative Leila De Lima para sa iya kaadlawan.
Una nga ginkwestyon ni De Lima ang paghipos sang PBBM sa pagbiya ni Torre.
Ginpamangkot ni De Lima kon ano ang natabo kay Torre nga sa pihak sang maayo nga performance, ginpahalin sa gihapon sa iya pwesto.
Ginkumpirmar man sang Malacañang subong nga adlaw nga may gintanyag nga posisyon sa gobyerno kay General Torre.
