Liwat nga nagtuhaw sa publiko si anay Presidential spokesperson Atty. Harry Roque pinaagi sa ginpakigbahin sini nga 14 minutes video sa iya social media account.
Ini ang sa tunga sang pag-tag sa iya bilang pugante matapos nga pila na kaadlaw nga wala matultulan sang House Sergeant-at-Arms kag PNP sang ginserbe ang arrest order sang Kamara sa iya nga law firm office sa Makati city kag 2 residence sa Metro Manila makaligad nga ma-cite in contempt sa ikaduwa nga kahigayunan sa Quad Committee hearing sadtong Setyembre 12 bangud sa pagbalibad nga magsumiter sang mga ginapangayo nga dokumento para i-justify ang paghabok sang iya nga manggad nga ginaangut sa operasyon sang iligal nga Philippine Offshore Gaming Operators (POGO).
Apang, sa nasambit nga video, nanindugan si Atty. Roque nga indi siya pugante sa layi bangud wala siya suno diri sang may ginlapas.
Gin-akusaran ni Roque ang Kongreso sang power tripping kasunod sang cite in contempt kag arrest order nga gin-isyu batuk sa iya.
Samtang, ginpahayag man ni Roque nga indi kwestiyonable ang iya nga manggad. Ginpaathag niya nga ang kadutaan nga anay ginapanag-iyahan sang ila nga pamilya sa Parañaque city ang anay ginatamnan sang palay ang nangin isa na karon ka subdivision kag commercial pa.
Matandaan nga una na nga ginpahayag ni Roque sa hearing sang QuadComm sadtong Agosto 22 nga nagikan ang naghabok nga manggad sini bangud sa pagbaligya sang ila nga family property nga isa na karon ka Multinational Village sa Parañaque City nga 1.8 hectare property nga ila nga ginbaligya sa balor nga mas ukon menos P216 million sa Velarde group.
Samtang, nauna na nga ginpahayag ni Batangas Second District Rep. Gerville Luistro nga naka-established sang overwhelming circumstantial evidence ang QuadComm nga nagapakita sang koneksiyon ni Attorney Harry Roque sa ginsalakay nga POGO nga Lucky South Corporation sa Porac, Pampanga.
