Naaresto na sang mga kapulisan ang anay pulis kag driver sini nga amo ang yara sa likod sang pagkadula sang beauty pageant contestant nga si Catherine Camilon sa Balayan, Batangas.
Suno sa Police Regional Office 4A nga ila nga naaresto si anay Police Major Allan de Castro sa Barangay Caloocan sa banwa sang Balayan.
Kalakip man nga naaresto ang driver-bodyguard sini nga si Jeffrey Magpantay.
Ang duha ang nagapangatubang sang kaso nga kidnapping kag serious illegal detention bangud sa pagkadula ni Camilon sadtong nakaligad nga tuig.
Una na nga ginbasura ang kaso sa duha sadtong Mayo 15 bangud sa kakulangan sang ebidensiya apang nagapangatubang man ang duha sa kapareho nga kaso nga gin-file sa Batangas Regional Trial Court.
Matandaan nga na-contempt na si de Castro sa hearing sa senado kag siya ang ginpreso sa Senate detention apang ginhilway man matapos ang duha ka adlaw.
Nagaguwa sa imbestigasyon nga may relasyon si de Castro kag ang biktima kun sa diin siya ang ulihi nga nakit-an nga kaupod antes ini nadula.
