Nagpanguna si former senator Manny Villar sa 15 ka Pilipino nga kaupod sa listahan sang Forbe’s Billionaires 2025 list.
Base sa Forbes sini nga Abril 1, 2025 nagdabong sang $17.2 billion ang manggad sang anay senador.
Mahibaluan sa nakalista sadtong 2024 may ara lamang ini sang $10.9-billion.
Ginakabig sa karon ang 75-anyos nga si Villar bilang pinakamanggaranon nga tawo sa Pilipinas.
Samtang yara ini sa pang-117 sa pinakamanggaranon sa bug-os nga kalibutan.
Ginsundan ini ni Enrique Razon Jr ang tag-iya sang International Container Terminal Services Inc. (ICTSI) nga may manggad nga $10.9-B net worth kag yara sa pang-227 sa listahan sang pinakamanggaranon nga tawo sa bug-os nga kalibutan.
Samtang yara sa pangatlo nga listahan si Ramon Ang ang chairman sang San Miguel Corp. nga may manggad nga $3.7-b net worth kag yara sa pang-979 nga puwesto nga pinakamanggaranon nga tawo sa bug-os nga kalibutan.
Pang-apat nga puwesto naman ang 90-anyos nga si Lucio Tan ang chairman sang LT Group nga may net worth nga nagalab-ot sa $3-B.
Sundanay naman sa listahan ang mag-utod nga Sy nga sanday Heny Sy Jr nga may manggad nga $2.3-B, Hans Sy nga may manggad nga $2.2-B; Herbert Sy nga may manggad nga $2.1-B, Harley Sy nga may $1.9-B nga manggad, Teresita Sy-Coson nga may manggad nga $1.9-B kag Elizabeth Sy nga may manggad nga ginabanta yara sa $1.7-B.
Sadtong 2024 nagpanguna ang mag-utod nga Sy sa listahan sang Forbes sa gintingub nila nga manggad nga $13-B samtang pangaduwa si Razon kag pangatlo naman si Villar.
Nagapanguna naman si Elon Musk sa pinakamanggaranon nga tawo sa bug-os nga kalibutan nga may $342-B nga ginsundan ni Mark Zuckerberg sang Meta nga may manggad nga naglab-ot sa $216-B samtang pangatlo si Jeff Bezos sang Amazon nga may mangggad nga naglabot sa $215-B.
