ROXAS CITY – Ginapreparahan na karon sang alkalde sang syudad ang pila ka mga tikang nga himoon angut sa mangin exit plan sang gobyerno pananglitan nga bawion na ang Enhanced Community Quarantine (ECQ) kag ipaidalum na lamang sa General Community Quarantine ang Roxas City pagkatapos sang Abril 30, 2020.
Ginalauman nga amat amat na nga magabalik sa normal ang sitwasyon sang pagpangabuhi sa syudad pananglitan nga madayon ang ginahandum sang tanan .
Nagpatigayon na sang serye sang kunsultasyon si Mayor Ronnie Dadivas sa mga stakeholders para sa ginadihon nga exit plan sang gobyerno agud ma-plastar ang mga polisiya nga igapatuman sa idalum sang GCQ.
Ginpahayag ni Mayor Dadivas nga pila ka mga establisemento ang amat amat nga pagabuksan agud may gamitan ang mga pumuluyo sang nabaton nga financial support nga gikan sa Social Amelioration Package (SAP) sang gobyerno.
Suno sa opisyal nga ipatuman sa gihapon sang pagabuksan nga negosyo ang mga precautionary measures kasubong sang social distancing, pagsuksok sang mask kag iban pa agud malikawan ang pagbalik sang coronavirus disease-19.
Apang ang mga spa, massage parlor, videoke bars ang indi pa mahimo magbalik sa operasyon, bangud sa daku nga risgo nga dala sang negosyo sa diin may yara sang physical contact nga mahinabo.
Pag-abot naman sa merkado publiko kag mga malls, mahimo nga ipabilin ang thermal scanning kag pagdis-infect ang nagasulod.
