Plano sang Food and Drug Administration (FDA) nga palawigon ang sakop sang discounted medicines kag medical devices indi lamang para sa senior citizens, kundi pati sa persons with disabilities (PWDs).
Sa isa ka statement, ginpahayag sang FDA nga gintalakay ini sa paghinun-anon sang mga opisyal sang ahensiya sa pagpatuman sang Administrative Order No. 2024-0017, nga nagakakas sa booklets sang senior citizens bilang requirement para sa ila discounted purchase sang bulong.
Antes ang AO No. 2024-0017, ang senior citizens ang kinahanglan nga magpresentar sang valid identification kag prescription sang doktor para maka-avail sang medical discounts.
Pahayag pa sang FDA nga ginatun-an man sini kun paano mapaayo ang pagpatuman sang value-added tax (VAT) exemptions sa idalom sang Corporate Recovery and Tax Incentives for Enterprises (CREATE) law, kag iban pa nga discounts nga gintalana sang nagkalain-lain nga layi para mapalawig ang mga benepisyo.
Plano man sang ahensiya nga magpatigayon sang lapnagon nga information campaign agud maathagan ang publiko sa mga benepisyo nga ini.
Dugang pa sang ahensiya, makabenepisyo man ang mga drug store kag healthcare provider sa ginpasimple nga transaksyon kag ginpadali nga discount process.
