Magahimo sang legal kag diplomatiko nga tikang ang gobyerno sang Pilipinas agud masiguro nga makabalik sa pungsod si former Ako-Bicol Party-list Rep. Zaldy Co matapos maaresto sa Czech Republic.
Ini ang ginpahayag ni Department of the Interior and Local Government (DILG) Sec. Jonvic Remulla.
Suno kay Remulla, gin-hold sa immigration detention facility si Co matapos ginapahayag gin-classify bilang undocumented foreign national.
Nagapati ang otoridad nga naghalin si Co sa France antes ini magsulod sa Czech Republic.
Pahayag pa ni Remulla, napaabot na sang gobyerno ang pagdakop kay Co bangud gina-monitor sang otoridad sa Pilipinas ang hulag sini sa Europe lakip na sa Italy.
Sa subong, wala pa nakahatag sang komento ang kampo ni Co.
Agud mahikot ang iya nga pagbalik, himuon sang Pilipinas ang duha ka mga posible nga tikang kag una diri amo ang pag-issue sang Interpol red notice kag ang coordination sa Prague government para sa deportation sang anay mamalidha.
Indi pa mapat-od suno kay Remulla ang petsa sang pagbalik ni Co sa Pilipinas bangud magadepende pa ini sa resulta sang legal kag diplomatic processes sa luwas sang pungsod.
Apang sa tion nga mabalik sa Pilipinas si Co, i-turn over ini gilayon sa Philippine National Police kag dal-on sa national headquarters sa Camp Crame, Quezon City.
Ipaidalom si Co sa medical examination kag documentation.
Pagkatapos sina, dal-on si Co sa Sandiganbayan, sa diin madetermina ang iya lugar sang detention samtang ginapangatubang ang mga kaso.
Ginpahayag ni Remulla nga mangin si President Ferdinand Marcos Jr. ang naga-monitor man sang amo nga developments.
Nagmandu naman ang presidente sa mga ooridad nga sundon sang hugot ang legal procedures kag himuon ang tanan nga remedies agud masiguro nga makabalik sa pungsod si Co.
Para kay Remulla, ang pagkadakop kay Co ang ginakonsidera nga major development sa pagpanikasog sang gobyerno agud mangibabaw ang accountability sa mga kaso nga may kaangtanan sa ginaalegar large-scale corruption.
Nagpaandam ang natungdan sa iban pa nga pugante nga himuon sang otoridad ang tanan agud nga sila ang madakpan.
