ROXAS CITY – Ginkompimar sang alkalde sang banwa sang Jamindan nga ginkakas na ang Extreme Enchanced Community Quarantine sa Barangay Lucero nasambit nga banwa.
Suno kay Mayor Mac Arthur Valdemar nga sang tinalikdan nga Lunes nga adlaw ginkakas na sini ang EECQ sa nasambit nga barangay sa diin ginapasugtan na nga maguwa ang mga residente sa tagsa-tagsa nila ka mga panimalay apang gin-athag sini nga ang curfew hour kag social distancing ang hugot sa gihapon nga pagasundon sang mga residente.
Gindugang pa ni Valdemar nga ginmanduan na sini ang mga katapu sang kapulisan nga ibanan ang nagabantay sa checkpoint sang border sang Barangay Lucero.
Samtang nagpapanog naman sang panibag-o nga Executive Order si Valdermar sa diin ginamanduan ang strikto nga pagbantay sa mga boundaries sang nasambit nga banwa sa kaiping nga mga kabanwahanan.
Suno sa kay Valdemar nga sandig sa ginpaguwa sini nga Executive Order no. 20 ukon Re-calibration of LGU Border Checkpoints Under Enchanced Community Quarantine nga hugot sini nga pagastriktuhan ang border sang Jamindan-Mambusao, Jamindan-Altavas, Aklan kag Jamindan-Tapaz.
Apang ginklaro sini nga wala ginapunggan ang mga deliveries sang mga essential goods gikan sa mga kaiping nga kabanwahanan.
