ROXAS CITY – Matapos ang kumpirmasyon ni Department of Health Secretary Francisco Duque III nga may una nga kaso sang Novel Coronavirus (NCOV) nga na-relord sa Pilipinas, nagakaubusan na ang mga face mask sa Roxas City kag probinsiya sang Capiz.
Gamay ukon dalagkuan nga drugstore sa karon ang wala na sang supply sang face mask kag may ginpahamtang sila nga karatula sa kilid sang botika nga facemask is out of stock.
Sa interview sang Bombo Radyo Roxas sa isa ka empleyado sang drugstore, ginpahayag sini nga humalin pa kagab-I naubos na ang ila nga face mask, bangud ang iban nagabakal sang pila ka boxes para sa proteksyon sang ila nga pamilya sa tion nga maglab-ot sa Capiz ang NCOV.
May iban man nga nagabakal sang 20 tobtob 50 boxes kag uka ginapadala sa ila nga mga himata sa Manila ukon sa iban nga pungsod bangud wala na sila sang makuhaan sang face mask.
Indi man makahatag sang sabat ang mga empleyado sang mga botika sa Roxas City ang sabat sang ila mga customer kun may magaabot pa sila nga supply sang face mask, bangud sa karon wala pa sila sang nabaton nga reply sa ila nga gin-order.
