ROXAS CITY – Viral sa karon sa social media site nga Facebook ang post sang isa ka Capizeña Overseas Filipino Worker (OFW) nga naga-apelar sang bulig bangud ginaalegar pila ka adlaw na nga ginapagutoman sang iya nga employer sa Kuwait.
Ba-se sa facebook post ni Yolanda Villasis, residente sang Barangay Agambulong, Jamindan, Capiz, isa ka domestic helper sa Zahra, Kuwait, gamit ang facebook username nga Gelyne Fuerte Besar, naga-mantinir na lamang sila sang iya mga kaupdanan sang tubig bangud wala sang ginahatag nga pagkaon sa ila.
Suno naman sa malapit nga abyan ni Villasis nga si Ires Casumpang Orpeza, madugay na nga nagapangayo sang bulig si Villasis bangud luyag na sini nga makapalagyo apang nahadlok ini nga madakpan kag akusaran sang iya employer nga isa ka kawatan.
Gindugang pa ni Orpeza, ginpahayag sa iya ni Villasis nga wala na sila sang ginakaon bangud ginakandaduhan sang iya nga amo ang ila nga kusina.
Bangud sang pagkabalaka, gin-share ni Orpeza ang nasambit nga facebook post sang iya abyan nga nagtuga man sang pagkahangawa sa madamo nga mga netizens nga may yara na sa karon sang kapin sa 1, 346 shares.
Nagalaum si Orpeza nga pinaagi sa bulig sang Bombo Radyo, mabuligan ang nasambit nga OFW kag mapabalik na sa Pilipinas.
