ROXAS CITY– Ginaduso sang City Council ang ordinansa nga mandatoryo nga pagsuksok sang faceshield kag facemask sa siyudad.
Ini ang ginkompirmar ni City Councilor Midelo Ocampo sang mainterview sang Bombo Radyo.
Ginpahayag ni Ocampo nga tinutuyo sang nasambit nga ordinansa nga madugangan ang proteksyon sang mga pumuluyo batuk sa balatian nga CoViD-19 rason nga gin-amyendahan ang facemask ordinance kag gindugang ang pagsuksuk sang faceshield.
Suno kay Ocampo nga kabahin ini sang tikang agud matapna ang pagtaas sang numero sang COVID-19 sa syudad.
Gin-athag ni Ocampo nga kinahanglan man nga magsuksuk sang facemask kag faceshield ang mga driver kag pasahero sang pampubliko nga salakyan.
Samtang nagpaandam naman si Ocampo nga may yara sang nagakaigo nga penalidad kag multa sa mga magabayolar sa nasambit nga ordinansa.
Sarang nga magabayad sang P500 nga multa para sa first offense; P3,000 sa second offense kag P5,000 para sa third offense.
Samtang, ginahulat na lamang nila ang pirma sang local chief executive pinaagi kay City Mayor Ronnie Dadivas.
