ROXAS CITY – May preparado na nga facilidad nga gindesignar ang city government para sa mga locally stranded individuals nga residente sang syudad nga magapauli sa Roxas City.
Ginpahayag ni Mayor Ronnie Dadivas, kasunod sang ginpaguwa nga Executive Order No. 18 ni Governor Esteban Evan Contreras II nga nagasaad sa guidelines para sa mga locally stranded individuals, overseas Filipino workers kag non OFW repatriates, nagdihon na sila sang tikang agud mapahamtangan sang lugar nga teniran ang magapauli nga mga residente sang syudad sang Roxas.
Suno sa alkalde may 79 ka mga actual residents ang Roxas City sa diin 35 diri ang ginhatagan sang opsyon nga magpauli ukon magpabilin sa Iloilo kag padalhan sang financial assistance.
Wala sang problema suno kay Dadivas kun magdesisyon sila nga magpauli, bangud may ginhanda na nga facilidad nga sarang teniran samtang nagapaidalum sa 14-day quarantine nga kabahin sang rekisitos nga napagkit sa Executive Order sang gobernador sa mga returning locally stranded individuals.
Magluwas sa 14 diyas nga quarantine, ipaidalum man sa rapid kag swab test ang mga nagabalik nga indibidwal para sa confirmatory results.
Sa kapin 30 ka mga residente sang Roxas City nga stranded sa Isla sang Boracay, ginpahayag sang alkalde nga 19 diri ang nahatagan na sang financial assistance agud masusteniran ang ila kinahanglanon.
Samtang maka-akomodar ang isa pa ka facilidad sa Barangay Milibili nga Hortus Botanicus sang 45 ka mga repatriated OFWs nga residente sang Roxas City.
Sa karon may anum ka mga OFWs nga nag-abot kag nagatenir sa nasambit nga facilidad.
