Hugot nga pagbantay sang kapulisan ang igapatuman sa pagahiwaton nga Faith-based national rally subong nga adlaw June 28, 2026.
Sa interview sang Bombo Radyo kay Police Captain Achilles P Fangco Jr., Officer in Charge sang Pilar Municipal Police Station, iya ginpahayag nga ang main nga pagahiwatan sang rally sa Edsa People Power Monument Metro Manila.
Suno kay PCPT Fangco Jr., ang amo nga white ribbon march diri sa local nga area may yara sila ginapatuman nga pag conduct, pag-pakig angot sa pila ka mga simbahan, kag pagbutang sang Police assistance desk sa mga matawo nga lugar.
Pahayag pa niya nga ginapanawagan ang tanan nga magtuman sa mga nagapadayon nga kasuguan kag pagsulundan, likawan ang ano man nga mahimo nga magresulta sa kagamo ukon paglapas sa layi, kag mangin responsable sa ila nga pagpakigbahin sa ano man nga aktibidad.
Dugang pa sang natungdan nga sa karon, wala pa sang grupo nga nag-file ukon nagkuha sang permit sa Pilar MPS para sa ano man nga rally ukon mass gathering. Apang, padayon ang ila nga monitoring kag koordinasyon sa iban nga law enforcement agencies agud makaresponder dayon kon may indi ginapaabot nga hitabo.
Sa karon, ginapanawagan man sang Pilar MPS ang publiko nga magpabilin nga kalmado, magbinuligay sa kapulisan pinaagi sa pagreport sang ano man nga kahinahinala nga aktibidad, kag magkooperar sa mga otoridad agud mapabilin ang malinong kag hilway sa peligro nga komunidad.
