MANILA – Makabig nga “national security concern” ang paglapta sang “fake news” sa pungsod suno sa Presidential Communications Office (PCO).
Sa forum kontra fake news sa Camp Crame nga gintambungan ni PCO chief Jay Ruiz, ginpahayag sini nga ginakahangaw-an ang lapnagon nga paglapta sang fake news gani padayon ang mga tikang sang gobyerno nga batuan ini.
Pahayag pa sini, kalakip diri ang paghimo sang operational framework kag iban pa nga mga inisyatibo agud tutukan ang pagtapna sang fake news partikular na sa social media.
Sa ginpatigayon man nga Consultative Forum, pormal nga ginlunsyar sang Philippine National Police ang Joint-Anti Fake News Action Committee ukon JAFNAC nga amo ang ginmanduan nga magpatuman sang mga programa kag proyekto agud masolusyonan ang paglapta sang fake news.
Ang nasambit nga komite ginapamunuan ni PNP Deputy Chief for Operations, PLt General Robert Rodriguez; kaupod si PBGen Marvin Joe C Saro, Director, PCADG bilang Vice Chairperson; kag mga nagapanguna nga unit sang PNP kasubong sang Anti-Cybercrime Group (ACG), Directorate for Operations, Directorate for Intelligence, Information Technology Management Service (ITMS), Office of the Chief PNP (OCPNP), Legal Service (LS), kag Police Community Affairs and Development Group (PCADG).
Ginpasiguro sang PNP nga ila papason kag may salabton sa layi ang tanan nga mga indibidwal nga amo ang may kahimuan sang fake news kag sala nga impormasyon sa pungsod.
