ROXAS CITY, CAPIZ- Ginpalapad pa sang Department of Health (DOH) kag mga lokal nga gobyerno ang kampanya para sa family planning sa bilog nga pungsod kadungan sang pagselebrar sang Population and Development Week 2025.
Ang Population Development Week ginaselebrar sa kada Nobyembre 23 tubtob 29 sa Pilipinas sa diin katuyuan sang amo nga programa nga mahatagan sang ihibalo ang mga pumuluyo natuhoy sa pag-usbong sang pamilya sa isa ka komunidad.
Sa interview sang Bombo Radyo kay Mrs. Mary Grace Francisco-Somil, Population Program Officer III kag Head sang Population Section sang Capiz Provincial Health Office, iya ginpahayag nga ang pamilya ang pinaka-una nga bahin sang pagtukod sang isa komunidad.
Suno kay Somil, importante nga mahibaluan sang mga pumuluyo ang dako nga papel sang pamilya, ilabi na ang mga ginikanan.
Pahayag niya, importante nga mahinalaan ang pagplano sang pamilya para sa mga mag-asawa agud masigurado ang maayo nga bwas damlag sang tagsa ka mga kabataan.
Nahibaluan nga sandig sa datos sang 2024 sang Philippine Statistics Authority, may yara sang masobra sa 835,000 ang numero sang mga pumuluyo sang probinsya sang Capiz.
Nagapanawagan naman ang natungdan sa publiko nga kun mahimo sundon ang mga programa sang Department of Health may kaangtanan sa pagplano sang pamilya agud nga indi man mabutang sa alang-alang nga posisyon ang mga kabataan nga mahimo.
Interviewed by Bombo Jessa Mae De Los Santos
