MANILA- Ginareview sang Maritime Industry Authority ukon MARINA ang bag-o nga fare increase sang mga ferry operator nga naga-serbisyo sa Mindoro, Romblon, Marinduque kag iban pa nga ruta sa Visayas.
Ini matapos magreklamo ang mga pasahero bangod sa pagsaka sang pamasahe, nga suno sa ila indi na makatarungan sa tunga sang padayon nga pagsaka sang presyo sang mga kinahanglanon.
Lakip sa mga shipping company nga nagpatuman sang bag-o nga fare hike ang Montenegro Shipping Lines, Starlite Ferries, Starhorse Shipping Lines, Archipelago Philippine Ferries Corporation kag Island Water.
Suno sa mga source sa industriya, ang fare increase yara sa 18 tubtob 20 porsyento, nga gina-ugnay sa pagsaka sang presyo sang fuel nga naglab-ot na sa sobra P100 kada litro.
Apang ginpahayag ni MARINA Region IV Director Maximo Bañares Jr. nga 10 porsyento lamang ang maximum fare increase nga ginatugotan sang ahensya. Suno sa iya, ginarepaso na sang MARINA ang mga ginpatuman nga fare adjustment kag pahibaluan ang mga operator kon magsobra ini sa ginapahanugutan nga limitasyon.
Ginpahanumdom man sang MARINA ang mga ferry operator nga kinahanglan nila i-roll back ukon paubson ang pamasahe kon magnubo naman ang presyo sang petroleum products.
