Fetus, nasapwan sa sulod sang museleo sa patyo sa Barangay Loctugan

ROXAS CITY – Tuman nga nakibot ang isa ka ginang matapos nakasapo ini sang isa ka fetus sa sulod sang Loctugan Public Cemetery sa Barangay Loctugan, Roxas City.

Sa interview sang Bombo Radyo kay Mika, ginpahayag sini nga nagpadulong siya sa amo nga patyo bangud ginapangita sini ang iya ginahuptan nga kuring.

Sa iya pagpangita, nakakita siya sang isa ka paper bag sa sulod sang isa ka museleo.

Bangud sa kuryosidad, iya ini ginbuksan apang ginkakibot sini sang makit-an ang isa ka fetus nga nakasulod sa isa ka garapon.

Ginabulubanta nga yara na sa tatlo tubtob apat ka bulan ang nasambit nga fetus.

Gilayon naman nga ginpabendisyunan ang nasambit nga fetus kag ginlubong sa patyo kun sa diin ini nasapwan.