ROXAS CITY – Nadesisyunan sang pamunuan sang Capiz State University (CAPSU) Main Campus nga ipaiway ang natalana kuntani nga field trip sang mga graduating students sa idalom sang Electrical Engineering Program.
Ini ang ginkompirmar mismo ni Dr. Wennie Legario, CAPSU-Campus Administrator sang mainterview sang Bombo Radyo.
Suno kay Legario, ini ang nadesisyunan kasunod sang ginpatawag nga meeting sa pagpanguna mismo ni CAPSU-President Dr. Editha Alfon bangud sang pamahog sang coronavirus disease (COVID-19) sa pungsod.
Ginpahayag ni Legario nga ang field trip sang nasambit nga mga estudyante ang kabahin sang ila mga curriculum.
Magabisita kuntani ang nasambit nga mga estudyante sa dalagkuan nga mga planta sa Baguio City kag sa Metro Manila.
Isa ini ka pamaagi agud aktwal nga makakita ang nasambit nga mga estudyante sang mga pasilidad nga mahimo nila nga maggamit sa tion nga i-practice na sang mga ini ang ila nga natun-an.
Mahibaluan nga kapin sa 7 ka adlaw kuntani ang nasambit nga field trip sang kapin 47 tanan ka mga graduating students.
Gindugang ni Legario nga wala paman sang pat-od nga petsa kun san-o patigayunon ang nasambit nga field trip.
