ROXAS CITY – Nagsugod na ang mga aktibidad sang Provincial Tourism and Cultural Affairs Office (PTCAO) para sa month-long celebration sang National Arts Month Celebration subong nga bulan sang Pebrero.
Suno kay Mary Therese Encina, Information Officer sang (PTCAO) nga ang nasambit nga selebrasyon ang sandig sa Presidential Proclamation No. 683 nga ginhingadlan bilang Fiesta Taliambong 2020 kag may tema nga ‘Ani ng Sining’.
Mayor nga katuyuan sang nasambit nga selebrasyon suno kay Encina amo ang mapakilala pa ang kinaiya kag kultura sang Capiz.
Isa man ini ka kahigayunan para sa mga local artists agud mapasangkad pa ang ila igkasangkol sa ila tagsa-tagsa ka mga patag.
Suno naman kay Mr. Anthony Colmo, ang Tourism Operations Officer kag Culture, Heritage and Arts Division Head sang (PTCAO), kalakip sa mga balantayan nga aktibidad amo ang pagpasundayag sang obra-maestra sang mga local artists sa probinsiya sa YESO Chalk Art Year 5, PINTA-Capiz Visual Art Exhibit Year 10, Mural Painting/Street Art, SAYLO: Kuris-Kuris Art Exhibition, kag Picturesque Photo Exhibit.
Ginalauman man nga pagadugukan sang tawo ang Sina-Dasal, isa ka theater play, Bravo Maestra Concert, Pasundayag sang Kinaadman, Adlaw sang Taliambong, kag Tukar Musical Concert, Balaybalay, kag madamo nga iban pa.
Sa ulihi, gin-agda sini indi lamang ang mga Capizeño kundi mangin ang mga dumuluong agud masaksihan kag makilala ang kinaadman kag taliambong sang mga local artists sa probinsiya.
