Patigayunon sa Nobyembre 21 tubtob Disyembre 7 sa masunod nga tuig ang FIFA Futsal Women’s World Cup diri sa Pilipinas.
Nadesisyonan na ang opisyal nga petsa sang hinampang sa ginpatigayon nga FIFA Council meeting sa Zurich sang tinalikdan nga semana.
Madumduman nga sang Mayo gin-anunsyar sang FIFA nga iga-host sang Pilipinas ang inaugural edition sang Futsal Women’s World Cup.
Sang Hunyo, ginpahayag ni Philippine Football Federation (PFF) President John Gutierrez nga ila ginakonsiderar ang fourth quarter sang tuig 2025 bilang potential dates para sa hinampang.
Suno diri, dako ang pagpasalamat sini sa FIFA sa pagsalig nga ginhatag para sa isa ka momentous event.
Samtang, suno kay Jaime Yarza, direktor sang FIFA tournaments, nangin interesado sa paghost sang tournament ang dalagko nga powerhouse sa futsal kag women’s futsal kaangay sang Brazil, Spain, kag Italy apang ang Pilipinas ang isa sa top contenders bangod sa pagsanyog sang football sa pungsod.
Suno pa diri, ang effort sang gobyerno sa pagpromote sang football kag futsal ang nangin yabi sa pag-angkon sang Pilipinas sa paghost sa nasambit nga tournament kun sa diin 16 ka team ang magacompete.
