Balik na sa practice si Filipina tennis star Alex Eala matapos ang pila ka adlaw nga pagtener sa Pilipinas agud magpreparar sa hard court season lakip na ang prestihiyoso nga US Open.
Si Eala magapadulong sa Washington, D.C. para sa maid-id nga training antes magapasakop sa Mubadala DC Open halin Hulyo 27 tubtob Agosto 2, kon sa diin magahampang siya sa dobles upod kay Venus Williams sang USA paagi sa isa ka wild card entry.
Kasunod sang tournament sa Washington, natalana man nga magpasakop si Eala sa mga kompetisyon sa Canada kag Cincinnati bilang kabahin sang preparasyon para sa US Open.
Ginpasalamatan man ni Eala ang mainit nga pag-abi-abi sa mga Pilipino pagkatapos sang iya makasaysayan nga kampanya sa Wimbledon, kon sa diin nakalab-ot ini sa fourth round kag ginkilala bilang “Star of the Swing” sang WTA sa grass season.
