Nagapadayon ang maayo nga kampanya sang Pinay tennis star nga si Alex Eala matapos nga gindominar sini ang British player nga si Mika Stojsavljevic sa straight sets, 6-1, 6-1, sa Round of 32 sang Toray Pan Pacific Open WTA 500 sang Oktubre 26.
Sa kadalag-an, nakasulod si Eala sa Round of 16 sang torneo, kon sa diin maga-atubang ini sa 22-anyos nga Australian tennis player nga si Talia Gibson, nga yara sa subong sa World No. 38.
Indi na bag-o para Kay Eala ang makaatubang si Gibson, bangud makaduha na sila ka beses nga nagkit-anay sa mga nagligad nga torneo sang 2023.
Matandaan una nga ginlutos ni Eala si Gibson sa score nga 6-3, 6-1 sa Women’s 40 Palma del Rio sa Spain sang Hunyo 2023 kag liwat nga nakaatubang kon sa diin ginlutos niya ini sa W25 Aldershot sa England, tatlo ka set nga may score nga 4-6, 6-4, 6-3.
