Nakasulod na sa semifinals sang Hong Kong Open ang Pinay tennis star nga si Alex Eala matapos malutos ang Croatian player nga si Antonia Ruzic sa straight sets, 7-6, 7-5, sa ila quarterfinal match.
Hugot ang una nga set matapos nga nagbayluhanay sang maayo nga rally kag puntos ang duha ka humalampang.
Sa second set nagpadayon ang mabaskog nga hampang sang duha, kon sa diin nag-abanse si Eala apang temporaryo nga gin-untat ang hampang bangud sa pag-ulan kag gilayon man nga nagbalik pagkatapos sang malain nga tiyempo.
Antes magsulod sa quarterfinals, una nga ginlutos ni Eala si Emerson Jones sa Round of 32, ginsundan sang kadalag-an batok kay Tereza Valentova sa Round of 16, kag sa katapusan ang iya kadalag-an batok kay Ruzic sa quarterfinals.
Sa sini nga kadalag-an, magapadayon ang kampanya ni Eala sa semi finals sang Hong Kong Open.
