Nagapangatubang sang kaso nga health care fraud sa Texas ang Filipino-American nurse nga si Marizel Cambri Yukee bangud sa ginaalegar nga kahilabtanan sini sa kapin $906 million nga peke nga insurance claims.
Suno kay Bombo Marissa Pascual, international correspondent sa Estados Unidos, iya ginpahayag nga si Yukee ang napasakaan na sang indictment kag sa karon yara na ini sa kustodiya sang mga otoridad samtang nagapadayon ang legal nga proseso batok sa iya.
Suno kay Pascual, dako nga kantidad sang kuwarta ang nalakip sa kaso kag magapatubang si Yukee sang sunod-sunod nga mga hearing sa korte.
Dugang pa sini, bangud sang amo nga insidente kag iban pa nga kaso sang fraud, mas ginahugtan sang Medicare kag sang mga otoridad sa Estados Unidos ang pagmonitor kag pag-usisa sang mga health care claims agud malikawan ang mga iligal nga transaksyon.
Nahibaluan nga ang parte sang gin-alegar nga kwarta ang gingamit para sa magarbo nga lifestyle sini, lakip na ang mahalon nga mga salakyan, alahas, balay sa Hawaii, kag isa ka resort sa Sta. Ana, Cagayan.
