Ginakabig sang mga otoridad sa Estados Unidos sang Amerika nga pugante ang isa ka Filipino-American physical therapist nga gin-alegar may kaangtanan sa isa ka multimillion-dollar nga health care fraud scheme sa New York.
Sa interview sang Bombo Radyo kay Marissa Pascual, international correspondent sa Amerika, iya ginpahayag nga si Conrado Dizon Lopez Jr., 51-anyos, ang yara sa Most Wanted Fugitives list sang U.S. Department of Health and Human Services Office of Inspector General (HHS-OIG) kag ginapatihan nga posible nagapanago sa Pilipinas ukon sa United Arab Emirates.
Base sa impormasyon sang U.S. Department of Justice (DOJ), si Lopez ang tag-iya sang Total Rehab, isa ka physical therapy clinic sa Brooklyn, New York. Gin-alegar sang federal prosecutors nga nag-upod siya sa pagpasa sang milyon-milyon ka dolyar nga reimbursement claims sa Medicare kag Medicaid para sa mga serbisyo nga wala nahatag, wala sang medical necessity ukon ginpatigayon sang mga wala sang lisensya.
Suno pa sa imbestigasyon, halin Marso 2009 tubtob Nobyembre 2011, naglab-ot sa $18.4 million ang kabug-osan nga reimbursement claims nga ginpasa sang Total Rehab sa Medicare kag Medicaid. Sa amo nga kantidad, ginabanta nga $2.8 million ang mga claim nga nakapangalan kay Lopez bilang rendering provider.
Nagaatubang si Lopez sang mga kaso nga health care fraud, conspiracy to commit health care fraud, false claims, false statements nga may kaangtanan sa health care, kag falsification of records.
Padayon naman ang panawagan sang HHS-OIG sa publiko nga maghatag sang impormasyon nga makabulig sa pagdakop kay Lopez kag sa paghibalo sang iya ginatagoan.
