MANILA-Nagapanawagan sang imbestigasyon sa National Bureau of Investigation ukon NBI ang Filipino-American TV personality nga si Ronn Tristan Perez nahanungod sa kamatayon sang iya iloy, nga napatay pito ka adlaw matapos magpa-cosmetic procedures sa Pilipinas sang Marso 2, 2026.
Suno kay Perez, gusto lamang niya mahibaluan ang matuod nga natabo sa iya iloy kag makuha ang mga dokumento nga magapakita kon nasunod ang tanan nga kinahanglan nga medical procedures kag protocols antes kag pagkatapos sang mga operasyon.
Ginpahayag ni Perez nga wala siya dayon nakapasa sang reklamo bangud yara siya sa Estados Unidos kag kinahanglan pa niya asikasuhon ang mga dokumento kag paglubong sang iya iloy.
Ginpabutyag man niya nga indi siya direkta nga nagapasaka sang akusasyon batok sa clinic, kundi nagapangita lamang sang klaridad kag mga sabat sa mga pamangkot sang ila pamilya.
Suno naman sa abogado ni Perez nga si Clarence Esguerra, importante nga maimbestigahan kon ngaa apat ka cosmetic procedures ang ginhimo sa iya iloy sa sulod sang isa ka adlaw, kag kon natapos kag nasunod ang tanan nga kinahanglan nga pre-operative checks antes ini ginhimo.
Ginpahayag ni Esguerra nga nagpangayo na sila sang medical records sa clinic, apang may pila ka dokumento nga wala pa nila nakuha. Bangud sini, nagapangayo sila sang bulig sa NBI para sa mas malawig nga imbestigasyon.
Ginapatukib naman sang NBI ang kaso. Suno kay NBI Director Melvin Matibag, ipatawag nila ang mga opisyal sang clinic nga nagsagawa sang mga cosmetic procedures sa iloy ni Perez.
Ginpahayag ni Matibag nga kinahanglan maimbestigahan ang kamatayon bangud mandato sang NBI ang pag-usisa sang mga kaso sang kamatayon, ilabi na kon may mga pamangkot nga kinahanglan sabton.
Samtang, wala naghatag sang komento ang clinic nga ginareklamo nahanungod sa kaso.
Suno kay Perez, ang ila pamilya nagapangita lamang sang kamatuoran nahanungod sa kamatayon sang iya iloy kag nagalaum nga ang imbestigasyon makahatag sang klaridad kag makabulig nga malikawan ang pareho nga insidente sa iban pa nga pasyente.
