ROXAS CITY – Suportado sang Filipino Community sa Japan si Nonito “The Filipino Flash” Donaire, sa iya nga handum nga makatimalos sa iya nangin kalutusan batuk kay Japan’s “Monster” Naoya Inoue, sa ila rematch sa teritoryo ni Inoue sa Hunyo 7, Martes.
Sa interview sang Bombo Radyo kay Bombo International Correspondent Mr. Josel Palma direkta sa Japan, ginpahayag sini nga makabig ‘underdog’ si Donaire, bangud sa wala sang mantsya nga rekord ni Inoue sa patag sang boksing.
Nahibaluan nga ang 29-anyos nga si Inoue ang may yara sang 22 ka mga daog kun sa diin 19 diri ang knockout, kag wala sang kapiyerdehan, kag ginakabig sang Japan nga Manny Pacquiao sang Pilipinas.
Samtang, ang pambato sang Pilipinas nga 39-anyos nga si Donaire ang may yara sang 42 ka mga daog, 28 diri ang knockout, kag may yara sang 6 ka mga kalutusan nga isa na gani diri ang nangin sambuwa nila sang 2019 ni Inoue.
Apisar mas bata si Inoue kay Donaire, abanse naman ang Pinoy sa iya kataason nga 5’7 batuk sa 5’5 sang kasumpong nga Hapon.
Matandaan nga ambisyon ni Donaire nga mangin undisputed world boxing champion.
Nahibaluan nga kun sin-o ang magadaog sa ila sambuwa, posible nga sunod nga makasambuwa sini ang bag-o lamang nagkampeon sa World Boxing Organization (WBO) nga si Paul Butler.
