Naghatag sang daku nga kadungganan sa probinsya sang Capiz kag sa Pilipinas ang Capiznon artist nga si Dorcel John Calinao matapos ang iya outstanding performance sa World Championships of Performing Arts (WCOPA) 2026, isa sa pinakasikat nga international competion para sa mga performers sa kalibutan.
Sa interview sang Bombo Radyo Roxas kay Calinao, iya ginpahayag nga indi madali ang iya naagyan tubtob nga nalab-ot niya ang mangin semifinalist sa Vocal with Self Accompaniment Category kag ginkoronahan man siya bilang Overall Division Champion bangud sang iya performance sa nagkalain-lain nga genre sang musika.
Nakabaton si Calinao sang walo ka Gold medals sa Broadway, Contemporary, Latin, Rap, Gospel, Original Works, R&B/Soul/Jazz kag World categories, samtang nakakuha man siya sang Silver medal sa Country category.
Suno kay Calinao, ang iya mga naangkon nga kadalag-an bunga sang padayon nga pagpaninguha, disiplina kag dedikasyon sa musika.
Paagi sa iya pagpasundayag sa WCOPA 2026, napakita niya nga ang talento sang mga Capiznon mahimo makigkompetensya kag magpangibabaw sa international stage, nga naghatag sang daku nga bugal sa Roxas City, Capiz kag sa bug-os nga pungsod.
