Nagpadayon sa pagpasundayag sang talento ang Filipino fashion designer nga si Benj De La Rosa matapos nga mapakita ang iya mga obra sa isa ka fashion event sa Dubai, United Arab Emirates, nga ginatambungan sang mga designers kag fashion enthusiasts halin sa nagkalain-lain nga pungsod.
Sa interview sang Bombo Radyo Roxas kay De La Rosa, iya ginpahayag nga daku nga oportunidad para sa iya ang pagpasundayag sang iya mga disenyo sa Dubai, ilabi na nga nagahatag ini sang chance nga makilala ang talento sang mga Pilipino sa international fashion industry.
Suno sa iya, ginapangabudlayan niya ang paghimu sang mga disenyo nga nagapakilala sang creativity, craftsmanship kag kalidad nga mahimo makasabay sa global standards.
Pahayag pa niya, naghatag man sang inspirasyon ang suporta sang Filipino community sa UAE kag sang iya mga kliyente sa pagpadayon sang iya karera sa fashion.
Nahibaluan nga ang Dubai ang isa sa mga kilala nga sentro sang fashion kag luxury sa Middle East, kun sa diin padayon nga nagadugang ang mga international fashion events nga nagahatag sang entablado sa mga designers halin sa nagkalain-lain nga bahin sang kalibutan.
