Natalana naman nga makabaton sang isa pa ka award ang boxing legend kag People’s Champ nga si Manny Pacquiao matapos gin-anunsyo nga mangin kabahin ini sang Class of 2027 sang U.S. National Boxing Hall of Fame.
Ang anunsyo ginhimo sa 3rd Pacquiao-Elorde Awards Night nga ginhiwat sa Manila, sa diin ginkumpirmar ni Eric Schmidt ang nasambit nga pagkilala.
Antes sini, nalakip man si Pacquiao sa International Boxing Hall of Fame Class of 2025 sa Canastota, New York.
Si Pacquiao kilala bilang nagaisahanon nga eight-division world champion sa kasaysayan sang boxing, , sa diin may yara siya sang 2 major world titles kag nakasambuwa ang 22 ka mga world champions sa bug-os niya nga karera.
Sa sulat sang National Boxing Hall of Fame, ginkilala si Pacquiao bilang “Main Event” inductee para sa Class of 2027.
Gindayaw man ang iya kontribusyon indi lamang sa boksing kundi sa iya serbisyo sa pungsod.
Ginalauman nga magatambong si Pacquiao sa induction ceremony nga pagahiwaton sa Abril 25, 2027 sa Quiet Cannon sa Montebello, California.
