ROXAS CITY – Ginsakdag sang mga Pinoy, subong man sang iban nga lahi ang isa ka Filipino restaurant nga nahamtang sa Edmonton, Alberta, Canada.
Ginapanag-iyahan ini sang pamilya Basinang-Pimentel-Perea nga mga tumandok sang Dulangan, Pilar, Capiz kag Cavite.
Sa interview sang Bombo Radyo sa mag-utod nga sanday Roche Pimentel-Perea kag Apolinario Basinang-Pimentel, ginpahayag sang mga ini nga nag-umpisa lamang sa mga potlucks ang ila family business, bangud sa huyog nila nga magluto, gin-engganyo sang ugangan ni Roche nga si Asuncion Perea nga taga Cavite nga mag-negosyo sang pagkaon.
Indi naman bag-o sa ila ang pagnegosyo sang pagkaon bangud ginpakigbahin sang mga ini nga nagbaligya sila sang kalan-unon sa guwa sang Dulangan Elementary School, sang magagmay pa sila.
Nagsugod sila sa gamay nga turo-turo, tubtob sang tuig 2018, nakapatindog sila sang restaurant nga ginhingadlan nila nga “Kusina Filipino” take-out and catering service.
Nagatan-ay sila sang nanari-sari nga mga ‘lutong Pinoy’, nga ila man ginabagay sa panahon.
Kaangay nalang sa karon nga summer season sa Canada, best seller sa ila ang turon nga saging sa merienda paresan sang halo-halo ukon bisan ano nga palamig, may yara man sang mga sud-an nga ginhalo nga Caviteño kag Ilonggo taste kapareho sang batchoy, kilawin, dinuguan, afritada, kaldereta, kag sa tion sang winter season patok naman sa ila ang ginapabugal sang mga Ilonggo nga KBL menu (Kadyos, Baboy, Langka).
Sa karon, nagapasalamat ang ila pamilya sa suporta sang Filipino community sa ila negosyo, kag madapadayon sa pagserbisyo pinaagi sa pagpabatyag nga daw sa Pilipinas lang ang mga ini bangud sa ila mga luto nga pagkaon.
Mensahe sang mag-utod sa mga negosyante nga nagasugod pa lamang, maabot ang tion nga magahina ang negosyo apang padayon lang nga magbakas, magsalig sa kaugalingon ilabi na sa Makaako.
