ROXAS CITY – Nagpatigayon sang pagsinapol ang Finance Committee sang Sangguniang Panlalawigan kaupod si Governor-elect Fredenil ‘Oto’ Castro, subong nga aga sang Lunes.
Ini ang ginkumpirmar ni board member Jonathan ‘Sonny’ Besa, sang mainterview sang Bombo Radyo.
Suno diri, tinutuyo sini nga pagsinapol bangud luyag sang magapungko nga gobernador nga mangin hands-on sa pagdumala sang probinsya.
Ginhinalaan sang amu nga komitiba ang AIP kag executive budget, ilabi na sa pampubliko nga hospital nga isa sa pagatutukan sang magatal-os nga administrasyon.
Sa pihak nga bahin, indi man luyag ni Besa nga pangunahan ang mangin tikang sang palaabuton nga administrasyon, apang wala ini sang nakita nga problema kun pagaliwaton ang pagplastar sang budget para sa 2022.
