Ginkumpirmar sang National Bureau of Investigation (NBI) nga ang fingerprint nga narekober sa botelya sang tubig sa sulod sang awto sang napatay nga TNVS driver nga si Raymond Cabrera nagtupong sa isa sa tatlo ka mga suspek nga si Jin Armin De Ocampo.
Suno sa autopsy, ginbuno sang makaduha ka beses si Cabrera sa wala nga dughan sa Parañaque sadtong Mayo nga gintunaan sang iya kamatayon.
Madumduman nga boluntaryo nga nagsungka kay Manila Mayor Isko Moreno ang tatlo ka mga suspetsado lakip na si De Ocampo sang Hulyo 10, kag gilayon nga ginturn-over sa NBI.
Matapos sini, gintudlo nila sa mga otoridad ang lokastyon sang bankay sang biktima.
Suno kay Atty. Joseph Martin sang NBI, plano sang mga suspetsado nga i-hijack ang salakyan sang TNVS, gamiton sa pagkuha sang isa pa ka pasahero nga mahimo nila agawon. Apang ginaalegar nga napaslawan sila sa pagtuman sang amo nga plano matapos nga ila ginpatay ang driver.
Samtang, ginpahayag ni Dr. Romel Papa sang NBI Forensic Division nga ginpatigayon man ang DNA analysis sa salakyan kag sa mga himata ni Cabrera kun sa diin nagpakita sang 99.99% match sa iya pamilya.
Suno kay NBI spokesperson Ferdinand Lavin, nagsugod na ang preliminary investigation may kaangtanan sa kaso nga robbery with homicide batok sa mga suspetsado.
