Naglab-ot na sa 655 ang numero sang mga pilason may kaangtanan sa palupok nga na-record sa bug-os nga pungsod bangud sang palupok sa tion sang pagsaulog sang paskwa kag bag-ong tuig, suno sa Department of Health (DOH).
Ini sa tunga sang nagapadayon nga data collection sang DOH-Epidemiology Bureau, nga narekord humalin Disyembre 21, 2025 tubtob Enero 3, 2026, may kabug-usan nga 351 ka mga biktima ang naga-edad 19 panubo, kag lunsay nag-angkon sang nagkalain-lain nga sahi sang paso kag pilas.
Base sa datus sang ahensya, 19 ang nadulaan sang kamot ukon tudlo sa diin 11 diri ang mga menor de edad. Ang pinakabata nga biktima amo ang apat ka tuig nga bata nga nadulaan sang tudlo sa iya tuo nga kamot.
Kalabanan sa mga kaso ang halin sa wala makilala nga sahi sang palupok, bangud indi madumduman ukon makilala sang mga biktima ang sahi nga gingamit. Ginsundan ini sang mga insidente tuga sang kwitis (skyrockets) kag ilegal nga 5-star.
Apang suno sa Department Of Health, 20 percent sa subong ang mas manubo nga numero kon ipaanggid sa 819 ka kabilugan nga kaso nga narekord sang Enero 3, 2025.
Ginapahanumdoman man ang publiko nga gilayon nga dal-on sa pinakamalapit nga ospital ang sin-o man nga maigo sang palupok agud magpabakuna sang libre, kag agud malikawan ang tetanus nga kinahanglan mahatag sa sulod sang 8 tubtub 21 ka adlaw.
