ROXAS CITY – Nagpakigbahin sang ila mga preparasyon kag advocacy ang first batch sang Lin-ay kag Hangaway sang Capiz 2026.
Sa interview sang Bombo Radyo kay Sam Andrada, Secretariat sang Lin-ay kag Hangaway sang Capiz, iya ginpahayag nga ang nasambit nga kompetisyon ang ginapasakupan sang nagkalain-lain nga banwa kag syudad sa probinsya sang Capiz bilang kabahin sang selebrasyon sang Capiztahan 2026.
Suno kay Andrada, ang subong nga tema ang nagasentro sa pagkaon ukon gastronomy nga magapakita sang ginapabugal nga pagkaon sang tagsa ka banwa kag syudad nila nga ginarepresentar.
Samtang, suno naman kay Shaniña Angelie Doria, ang mangin representative sang syudad sang Roxas sa Lin-ay kag Hangaway sang Capiz 2026 ang isa ka daku nga responsibilidad nga ginahatagan gid sini sang pagtamod indi lang sa katahom sang dagway kundi mangin ang maayo nga pinamatasan.
Pahayag naman ni Coleen Faye Peniero, Lin-ay sang Banwa sang Tapaz, iya ginpahayag nga importante gid ang focus sa competition lakip na ang paghanda sang kaugalingon mentally, physically, emotionally and spiritually.
Suno naman kay Kirk Gamo, Hangaway sang banwa sang Tapaz, importante nga ginahandaan ang physical appearance bangud ini ang nagahatag sang confidence kag makabig nga stage ready pag-abot sang competition.
Dugang pa ni Christian Jay Cuenca, Hangaway sang syudad sang Roxas, importante man ng ang pagresearch agud makadugang pa sang ihibalo sa kultura kag tradisyon sang probinsya sang Capiz.
